DOSIER - Tema 5: As programacións didácticas.

As programacións didácticas

Nesta clase traballamos o tema 5 da materia As linguas estranxeiras no contexto español e internacional. Este tema trata sobre as programacións didácticas vixentes na ESO (LOMCE), Bacharelato (LOMCE), FP (LOE e LOMCE) e Escolas Oficiais de Idiomas (LOE).

En primeiro lugar empezamos cunha actividade coa aplicación Kahoot. A actividade consistía nunha serie de preguntas sobre as programacións, as responsabilidades dos centros, das Comunidades Autónomas e as estatais. Foi moi interesante porque nos evidenciou, ou polo menos a min, que aínda temos moitas dúbidas en determinadas cuestións que cremos saber e que temos que repasar os contidos e aclarar as dúbidas. Creo que como actividade de autoavaliación é moi interesante e completa. Aínda que en termos xerais as respostas foron axeitadas, houbo bastantes erros por parte de todos. Coido que este tipo de actividades interactivas resultan entretidas e axudan a prestar atención. Ademais, aplicadas nun contexto de secundaria, o feito de competir pode resultar un estímulo interesante. Ao tratarse dunha competición «anónima», non deixa a ninguén en evidencia, unicamente se desvela ao gañador, o que tamén me parece salientable.

A continuación, fixemos unha actividade grupal en pirámide para decidir cales son os elementos máis importantes nunha programación entre todos. Unha vez feita, ao igual que fixemos na clase anterior pasamos a traballar nun documento conxunto en Google Docs chamado Observación programacións. Os alumnos dividímonos en grupos e tivemos que escoller un centro público e buscar unha programación didáctica para facer as observacións que considerásemos oportunas sobre elas, entre outros aspectos tiñamos que indicar se se axustaba aos parámetros esixibles nunha programación (para iso contábamos cun documento de axuda repartido na clase) e se aparecían citadas as fontes de información, tamén tiñamos que facer unha breve descrición dos contidos e unha valoración xeral dos aspectos a destacar.

No caso do noso grupo escollemos ao chou unha programación didáctica do IES Santa Irene, que resultou ser moi completa e un modelo a seguir, pero foi interesante descubrir que as programacións dos centros escollidos polos nosos compañeiros non o eran tanto, mesmo nalgún caso se trataban de programacións moi deficientes.

Paréceme moi importante ler e observar programacións diversas para poder entender dun xeito máis claro como debe ser realmente unha programación. Resulta moi útil ter un exemplo do que se debería facer e o que non. Son moitos os elementos que se deben incluír e resulta tremendamente sinxelo deixar algo atrás. Creo que a elaboración dunha programación didáctica é un labor complexo, minucioso e laborioso e ten que ser así pola relevancia que ten. Con todo, aprender a facela é unha cuestión de práctica e tempo. Coido que como estudantes do mestrado, este é probablemente o apartado que nos resulta máis difícil de levar a práctica. Por esta razón esta actividade me pareceu moi interesante e útil.