DIARIO: A aprendizaxe de linguas en España

Unha das problemáticas que se debateron nas clases desta materia foi a situación da aprendizaxe de linguas en España con respecto ao resto de Europa. Case todos estamos de acordo en que os obxectivos de cara ao 2020 son excesivamente ambiciosos, pero cal é a situación real?

Aínda que realmente me parece que imos con retraso con respecto á maioría dos países da nosa contorna, tamén é certo que houbo moitos avances nesta última década. No sector de empresa a necesidade de usar o idioma, o inglés concretamente, aínda que tamén o francés no sector do automóvil, fixo que moita xente se aplicara a este nivel. Se temos en conta que unha boa parte dos alumnos universitarios tiveron a ocasión de realizar unha bolsa Erasmus, xunto coas facilidades para poder viaxar trouxeron un cambio significativo na nosa sociedade. 

Aínda nos queda moito camiño por percorrer, pero estamos na senda. Hai un sentimento de vergonza colectivo que nos impide sacudir o complexo con respecto á nosa capacidade lingüística, pero creo que é equivocado. Debemos ter en conta de onde vimos e darnos un tempo. Non creo que as cousas cambien moito de aquí ao 2020, pero si penso que pouco a pouco iremos avanzando.

Con todo, nunca debemos esquecer que todas as linguas son igual de importantes e detrás de cada unha delas hai unha cultura. Por iso, respectemos a nosa propia lingua e cultura, será a ponte que nos una.